عيد الربيــــــــــع

كل سنه وانتو طيبين
ياريت تكونوا عرفتم تشموا النسيم في الجو العام اللي يسد النفس
أهى الحكومة كتر ألف خيرها غلت كل حاجه حفاظ على صحة الشعب
لاحد هيخرج ويجى له ضيق تنفس من الرصاص اللى مالي الدنيا
ولا حد هيعرف يشترى الفسيخ المعفن اللى مش عارف بياكلوه ازاى
لكن وبكل صراحة اعترف انى شفت الفسيخ مره واحده فى حياتى
بس والله مكنش قصدى انا كنت راكب ميكروباص ومعايا حسام
شويه كده ركب واحد ومعاه لفه معرفش فيها ايه
وفجأة حسيت اننا فى بلاعة ( والله البلاعه ارحم )
اللى صعب عليا أكتر من نفسى كانت واحده ست كبيره
ورغم ان حظها كان كويس كانت قاعده جنب الشباك
إلا إن حالتها كانت تصعب على العادلى
مش عارف لحد دلوقتى ايه هو السبب
اللى بخلى الناس تعمل فى نفسها وفى الناس كده

شم النسيم طبعا مايتنسيش دا كفايه اننا بناخد فيه اجازه
( ومفيش طفل فى الدنيا مبيحبش الاجازه )
غير كده بصراحه هو من الاعياد اللى انا مش بحتفل بيها
ودا لسبب بسيط قوى .. وهو انى مش بحتفل بحاجه خالص
وذكرياتى عنه طبعا أبسط وأهمها طبعا البيض …. الايج
كانوا اخواتى دايما قبلها بيوم تبدأ مراسم الاستعداد
لمهمة جديدة ( حاكم حياتنا كلها مهمات )
ألا وهى تلوين البيض الابيض والاحمر
مش عارف لتانى مره ايه هو السبب
مع ان البيض مش نافص اساسا
لكن أنا طبعا مش من المشاركين فى تلك المهمه
مش عشان رأفة بالبيض انما عشان علاقة
الكراهيه اللى بينى وبينه

من الحاجات الجميله اللى افتكرها
اننا كنا بنطلع على الاراضى الزراعيه اللى كانت ملهاش اخر
( منهم لله الظلمه) إحنا وباقى شلة المتشردين من حارة اليهود
( هى مش اسمها كده عشان فيها يهود لكن السبب هو ان حارتنا
كلها زملكاويه متعصبين اكتر من حزب ساش والاهلاويه بحقدهم
اطلقو عليها الاسم دا مع انهم اطيب ناس فى مصر )
المهم كنا بنجيب حاجه اسمها فليه كانت ريحتها كويسه
وشبه البرسيم ولما نروح بعد يوم ملىء بالمغامرات والمناورات
بنحطها تحت المخده مش عارف ليه
مش عارف برضه لحد دلوقتى ايه هو السبب

أدى الربيع عاد من تانى
طبعا عمرى مانسى فريد الاطرش واغنيته الجميله دى
اللى كانت بتملا التليفزيون فى اليوم دا
الدنيا ربيع والجو بديع
سعاد حسنى فى فيلم خلى بالك من زوزو
اللى كان عاجبنى فى الفيلم دا حاجه واحده بس
سمير غانم لما كان بيقدموا استعراض لما بدى يتسنى
يمكن عشان كان ايامها مكتسح التليفزيون
بفوازير فطوطه وبما اننا اطفال كنا بنحبه قوى
بلاش كلام فى موضوع الطفوله دا عشان بزعل
ياريت الواحد كان فضل طفل للابد


سنعـــــــــود

Advertisements

مفارقـــــــــات

أن تكـــون أنت فى موضــــع المسـئول
ولا مسئـول عنك

أن تكــون أنت فــى وضعـية المرغــوب
ولا مرغـــوب لك

أن تكـــون أنت دائمآ نهــــرآ للعــــطاء
لمــن لا يســحق

أن تكــــون علـــى دراية تامة بالخـــطأ
وتتصـنع الغفله

أن ترجوا رضى أشخاص وتأمل عطفهم
فى سبيل هلاكك أنت

أن تتحمل أخطاء غيرك برضاك
وتنسى أخطائك

شريد يا قلبى

محاكمة عسكرية لمدنين

الحكم بالسجن على 27عضوآ من جماعة الاخوان المسلمون
بــمـــدد تــــــتراوح ما بـــين ثلاث إلــــى عشـــــــر ســـــنوات
بينهم النائب الثاني للمرشد العام للجماعة محمد خيرت الـشاطر
ومصادرة ممتلكات عدد منهم، فيما قررت الإفراج عن الـ 13 الآخرين

رغم خنقتنى الشديده من موقفهم الاخير من إضراب 6 إبريل
ورغم علامات الاستـــــفهام الكتير قـــــوى حــــول الجمـــاعه
إلا أنا أرفض وبشده محاكمة أى شخص مدنى محاكمة عسكرية

وبعدين يعنى هما دول اللى خطر على الامن القومى
دا ماشاء الله يعنى مفيش اكتر من الحرامــيه فى البلد

واشمعنى يعنى محاكمة عسكرية
ومحاكمة ليه من اساسه هو فى قانون فى البلد

حصيلة أحداث المحله

رغم كمية التعتيم الكبيره على احداث المحله الكبرى
سواء على الفضائيات أو القنوات المحليه الحكوميه
إلا أن أعداد القتلى والمصابين والمعتقلين أصبحت معلومه للكثير
من خلال المدونات والمواقع الالكترونيه


وبلغ عدد المعتقلين حوالى 331 والمصابين ثمانون
منهم أربعه فقأت أعينهم بالرصاص المطاطى
والقتلى إثنان منهم فتى فى الخامسة عشر من عمره
أصيب وهو فى شرفة منزله بثلاث رصاصات منهم واحده فى العنق

وبالنسبه لافراد الامن رغم قلة أعدادها الملحوظ
لم يدعهم المتظاهرين وشأنهم ( منهم لله )
فأصيبوا فى تلك الاحداث بإصابات خطيره جدآ منها الفزع والهلع والتوتر

كان الله فى عونهم جميعا ( معقوله نعمل كده فى ملائكة الرحمه )

إن لم تستحى فأفعل ما شت

اللى بيقولوا إن الناس هى اللى بتكسر وبتحرق وبتدمر

شوفو بيعملوا ايه ماهو اللى اختشو ماتو

مش دى برضه واحده من عربيات الامن المركزى

اللى بتقولوا إن الناس هى اللى بتكسرها , اتفضل ياعم

اللى ما يشترى يتفرج

وعلى عينك يا تاجر

يعنى هقول ايه بس ….

ليكو يوم يا ظالمه يا ظالمه

يوم الاحد الاسود

يوم أسود أخر فى تاريخ مصر

أنا هكتفى دلوقتى بالصور لان النت زى حالة البلد اليومين دول

المهم المظاهر بدأت سلميه جدآ من أول خروج للورديه الساعه 3 مساءآ

لأن القيادات العمليه كان مفبوض عليهم من الصبح

وكالعاده طبعآ الامن تحرش بالناس وبدأ يضرب بكل قوه

كأننا من الحبشه وهما من الجنس الارى

واستخدم جميع الوسائل لفض المظاهره ابتدأ من الشوم والقنابل المسيله للدموع

لحد الرصاص الحى مع ان الناس كانو مسالمين

كأننا فى غزه بالظبط

وبدأ القمع الاسرائيلى أقصد المصرى للجميع

المصابين و الجثث يتم نقلهم لمستشفيات المنصورة

و تقوم الشرطة بمصادرة طلقات الرصاص الحي

الذي يتم استخراجه من أجساد المصابين و من جثث الشهداء

حنــــــــــان الام

قابلنى النهارده احد العاملين بمصنع الزيوت بالمنصوره
وقالى انهم نبهوا عليهم بإن اللى هيغيب بكره
هيتخصم منه ثلاثة ايام من المرتب ومن الحافز ومن الارباح

شوفو بقى الدوله خايفه علينا قد ايه ( حنان الام بقى )

اعلانات احمد جز

ahmed_ezz.jpg

يعنى بصراحه حاجه تفرس ومش تفرس بس حاجه تشل
حاجه تشيب الكتكوت يا جدعااااااااااااان على رأى محمد رضا
يعنى كان فى رمضان ماشى مش مشكله الناس صايمه
وهيدعوا عليه وخلاص ويقولو منه لله ربنا ياخده طياره تاكله
انما عدى عليه عيدين وكام شهر والناس مبقتش لاقيه العيش
ولسه لحد دلوقتى اعلاناته شغاله فى كل القنوات المحليه والفضائيات وفى كل داهيه
مش هعلق على اللى جوه الاعلان لانه eggs
يعنى هو عايز ايه بالظبط
معقول مش حاسس باللى بيحصل فى البلد ( اما انك جز صحيح ) .

مش كفايه انه بيحرق دمنا كل شويه لما يجى يتكلم عن خطة الموازنه
اللى هو بيترأسها , يرضى مين دا بس

اللهى ربنا ينتقم منك يا بعيد وتبقى نهايتك عن قريب ونشوفهم واقفين عليك ثانيه حداد
وتذاع فى كل القنوات المحليه والفضائيات ويقولوا نهاية كل جز

لا حول ولا قوة الا بالله

سياسي هولندي يبث فيلماً يوجه انتقادات لاذعة للإسلام ويتهمه فيه بالعنف.

ومسرح في ألمانيا يعرض مسرحية عن رواية “آيات شيطانية” لمؤلفها الكاتب البريطاني سلمان رشدي.

وذكرى الرسوم الكاريكاتيرية المسيئة للرسول لا زالت حاضرة في الأذهان.

ما السبب وراء انتشار الأعمال الفنية المنتقدة للاسلام في الآونة الأخيرة؟
وهل هو الاسلام وحده الذي يتعرض للانتقادات ?
أم أن المسلمين هم الذين يشعرون بحساسية زائدة تجاه الأعمال التي تتناول دينهم؟
وكيف يكون التعامل مع الأعمال الفنية المسيئة للأديان بشكل عام؟

يقول رسولنا الكريم عليه الصلاة والسلام : “توشك أن تتداعى عليكم الأمم
كما تتداعى الأكلة على قصعتها، قالوا: أومن قلة نحن يومئذ يا رسول الله؟
قال: بل أنتم يومئذ كثير، ولكنكم غثاء كغثاء السيل،
وليقذفن الله في قلوبكم الوهن، قالوا: وما الوهن يا رسول الله؟
قال: حب الدنيا وكراهية الموت”

بداية العصيان المدنى

اضراب عام فى كل مصر

64.jpg

إتفقت كافه القوي الوطنية في مصر علي أن يكون يوم 6 إبريل
يوم إضراب عام في مصر يوم 6 إبريل
خليك قاعد في البيت
أو شاركنا فى الميادين العامة
أوعي تنـــــــــزل

لكن شاركنا
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه

ماتروحشي القسم
ماتروحشي المعسكر
عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا

عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب
حزب العمل المصري- حركة كفاية – الإخوان المسلمين – حزب الكرامه –
حزب الوسط – حركة موظفي الضرائب العقاريه – عمال غزل المحلة –
حركة إداريي وعمال القطاع التعليمي – نقابة المحامين –
حركة أستاذه الجامعات 6أبريــــــــــــل … أضراب عام في مصر

انا لو قلت لاخويا مش هنفتح يومها

هيفصل عنى النت